EMBUN MALAM

Pigi tamu aku
bilang urang saja-saja cuci-cuci mata
ujan-ujan tida juga aku risau
biar la ba asal hati sinang...

suda paking kerita,
bejalan la ba aku macam selalu
dari gerai ke gerai aku merunda
betul-betul indah, lagi-lagi mura-

pigi la aku di baju-baju bundle
meningu kalau-kalau ada yang ngam di hati
takajut juga la
dulu ada yang dua ringgit sikarang paling mura pun lima ringgit

minyak naik dua pulu sin ba kan?
Kenapa ka baju naik harga sampai tiga ringgit?
minyak naik dua pulu sin ba kan?
Kenapa ka tadi itu martabak jawa naik satu ringgit yang dulu satu ringgit?

dalam ati merunta-runta
bikin panas... bilang si gaman
nda la ba aku membeli sebab hilang mood sudah
telampau la ba dorang ni kasi naik harga, bisik di hati

sedang hatiku kegerigittan
tejumpa pula si Rujiah, belimpas kami
aku tegur la ba dia...
"Hai, Rujiah..." nada lembut tu.

Dia pun jawab juga,
"Hai... apa ko buat di sini?"
Aik, bilangku... pigi tamu la ba...
Ketawa kami sama-sama...

tiba-tiba,
datang buduku...
aku belanja dia martabak jawa
yang tadi aku mara-mara.

Apa la kaitannya sama tajuk embun malam?
dalam hati ko kan.
Tamu kudat malam selasa la ba...
‪#‎demisinta‬